झापा, १३ बैशाख । झापा दमका ६२ वर्षीय पुरुषमा कोरोना भाइरसको संक्रमण पुष्टि भएपछि प्रहरीले त्यस क्षेत्रलाई उच्च निगरानी राखेको छ साथै सिल गर्ने तयारी गरेको छ ।
बीपी कोइराला स्वास्थ्य विज्ञान प्रतिष्ठानमा गरिएको परीक्षणमा उनमा संक्रमण भएको शुक्रबार पुष्टि भएको हो । त्यसलगत्तै प्रहरीले दमक नगरपालिका वडा नं ३ लाई सिलबन्दीको तयारी गरेको छ ।
संक्रमित व्यक्ति हाल अस्पतालको आइसोलेसनमा उपचारत छन् । जिल्ला प्रहरी झापाका प्रमुख एसपी कृष्ण कोइरालाका अनुसार गत मार्च १९मा दुवईबाट आएका एक युवकको परिवारमा स्वाब परीक्षण गर्दा उनका बाबुलाई कोरोना संक्रमण देखिएको हो ।
परीक्षणको रिपोर्ट भर्खरै आएका त्यस क्षेत्रलाई सिल गर्ने विषयमा छलफल भैरहेको बताए । ‘झापा जिल्लामा विदेशबाट आएका सबैको नागरिकको विवरण संकलन भएको छ उनीहरुलाई संक्रमण देखिए त्यस ठाउँमा सिलबन्दी गरेर अन्त फैलिन नदिन प्रयास हुनेछ, अहिले दमकमा हाम्रो टिम परिचालन भैसकेकको छ’, एसपी कोइरालाले भने । उनका अनुसार अहिल सो क्षेत्र उच्च निगरानीमा राखिएको छ ।
बीपी कोइराला स्वास्थ्य विज्ञान प्रतिष्ठानको प्रयोगशालामा भएको परीक्षणमा झापाका एक ६२ वर्षीय पुरुषमा कोरोना संक्रमण देखिएको स्वास्थ्य तथा जनसंख्या मन्त्रालयका सह प्रवक्ता डा. समिरकुमार अधिकारीले जानकारी दिए । उनको अवस्था सामान्य रहेको पनि उनले बताए ।
यो सँगै नेपालमा कोरोना संक्रमितको संख्या ४९ पुगेको छ । भने १० जना निको भएर घर फर्केका छन् ।
