झापा र भोजपुरका पुरुषले पनि जिते कोरोना ,
विराटनगरबाट डिस्चार्ज हुनेको संख्या १६ पुग्यो
विराटनगर । विराटनगरको कोशी अस्पताल कोभिड १९ उपचार केन्द्रमा उपचार गराइरहेका थप दुईजना आईतबार डिस्चार्ज भएका छन् ।
कोरोनामुक्त भएका झापा र भोजपुरका एक–एक जना डिस्चार्ज भएका हुन् । भोजपुरका २७ वर्षीय युवक १० वैशाखमा अस्पताल भर्ना भएका थिए । साउदी अरबबाट आएको ४१ दिनपछि युवकमा कोरोना देखिएको थियो ।\
झापा दमकका ६३ वर्षीय वृद्धलाई १२ वैशाखमा कोरोना देखिएपछि कोभिड–१९ उपचार केन्द्रमा भर्ना गरिएको थियो । संक्रमित वृद्धका छोरा बैदेशिक रोजगारीबाट फर्किएका थिए । उनीहरू दुवैको रिपोर्ट आइतबार नेगेटिभ आएको हो । ‘उहाँहरूको रिपोर्ट नेगेटिभ आएपछि डिस्चार्ज गरेका छौं,’ कोशी अस्पताल कोभिड–१९ उपचार केन्द्रका प्रमुख डाक्टर दीपक सिग्देलले भने, ‘जनप्रतिनिधिको समन्वयमा उहाँहरू घरमा नै क्वारेन्टाइन बस्नुहुन्छ ।’
आइतबार दुईजना डिस्चार्ज भएसँगै कोशी अस्पताल कोभिड–१९ उपचार केन्द्रबाट डिस्चार्ज हुनेको संख्या १६ पुगेको छ । बुधबार ६ र शुक्रबार ८ जना डिस्चार्ज भएका थिए । १६ जना डिस्चार्ज भएपनि अस्पतालमा चारजना बिरामी थपिएका छन् । डा। सिग्देलका अनुसार उदयपुरमा संक्रमण देखिएका चार महिला अस्पताल भर्ना भएका हुन् ।
