मोरङ– प्रेमीसँग मिलेर श्रीमतीले श्रीमान्को हत्या गरेकी छन् । इटहरीको खनार घर भएका देवीप्रसाद दुलालको हत्यामा उनकी श्रीमती मीना श्रेष्ठको संलग्नता खुलेको हो । प्रेमी ब्रह्देव साहसँग मिलेर मीनाले श्रीमान्को हत्या गरेको मोरङ प्रहरीले जनाएको छ । दुलालको
३३ वर्षीय दुलालको आइतबार बिहान विराटनगर महानगरपालिका–१० मधुमारामा हत्या भएको थियो । उनी विराटनगरमा औषधि व्यवसाय गर्थे । हत्यामा श्रीमती ३३ वर्षीया मीना र उनका प्रेमी सिरहाका २१ वर्षीय ब्रह्मदेव साहको संलग्नता खुलेको छ । दुवै जनालाई पक्राउ परेका छन् ।
मोरङका प्रहरी प्रमुख एसपी विश्व अधिकारीले श्रीमतीकै योजनामा घटना भएको देखिएको बताए । दुलाल सुतेको समयमा प्लाष्टिकको डोरीले घाँटी कसेर हत्या गरेको प्रारम्भिक अनुसन्धानबाट खुलेको एसपी अधिकारी बताउँछन् ।
ब्रह्म्मदेवले खुट्टा र शरीर थिचेपछि श्रीमतीले घाँटीमा कसेर हत्या गरेको प्रारम्भिक अनुसन्धानबाट देखिएको प्रहरीले जनाएको छ । दुलाल र मीनाबीच १० वर्ष पहिले प्रेम विवाह भएको थियो । उनीहरुका ८ वर्षका छोरा छन् ।
प्रहरीका अनुसार मीना र उनका प्रेमी ब्रह्मदेवबीच एक वर्षदेखि प्रेम सम्बन्ध रहेको खुलेको छ । ब्रह्मदेव चार वर्षदेखि दुलालकै औषधि डिलरमा काम गर्थे। त्यही क्रममा मीनासँग उनको हिमचिम बढेको चाल पाएर श्रीमान देवीप्रसाद दुलालले ब्रह्मदेवलाई पाँच महिनाअघि कामबाट निकालिदिएका थिए ।
