पुष्कर खड्का
काठमाडौं - मन्त्रिपरिषद बैठकले भारतले मिचेको भूमि कालापानी लिम्पियाधुरासहितको नयाँ नक्सा सार्वजनिक गरेको छ । सोमबार बसेको बैठकले यस्तो निर्णय गरेको हो।
सोमबार साँझ बसेको मन्त्रिपरिषद् बैठकले लिम्पियाधुरा, लिपुलेकसहितको नक्शा पारित गरेको सरकारका प्रवक्ता एवं सञ्चार र अर्थमन्त्री डा. युवराज खतिवडाले जानकारी दिनु भयो । बैठकमा भूमि व्यवस्था मन्त्री पद्मा अर्यालले नयाँ नक्शा पेश गरेकी थिइन् । संसदीय समितिले पनि सबै नेपाली भूभाग समेटेको नक्सा छाप्न पटकपटक निर्देशन दिएका थिए।
नयाँ नक्शामा नेपालको संघीयताअनुसार प्रदेश र स्थानीय तह पनि समेटिएको जानकारी दिँदै डा. खतिवडाले भने, ‘यो नक्शा बमोजिम नै हाम्रा निशान छापहरु र सरकारी कामकाजमा प्रयोग गरिने नक्शा, पाठ्यपुस्तक र सार्वजनिक प्रयोगमा ल्याइने नक्शा अध्यावधिक हुनेछ ।
भारतले नेपालको लिपुलेक हुँदै चीनको मानसरोवरसम्म जान सडक बनाएपछि भारतबाट अतिक्रमित भूभागसहितको नयाँ नक्शा प्रकाशित गर्न सरकारमाथि तीब्र दबाब परेको थियो । भारतीय कदमको नोपलमा सबै पक्षबाट तीब्र आलोचना भइरहेको छ। नयाँ नक्शामा भारतले वार्षैदेखि अतिक्रमण गरेको लिपुलेक, लिम्पियाधुरा र कालापानी समेटिएको जनाइएको छ ।
सत्तारुढ दल नेपाल कम्युनिस्ट पार्टी सचिवालय बैठकले पनि ती भूभागसहितको नक्सा सार्वजनिक गर्न सुझाव दिएको थियो।
