पैसाको विवाद भएपछि यूएईको उडान रोकियो, आफ्नै खर्चमा आउने अन्य यात्रु लिएर अर्को उडान

 

 

 

 २०७७ जेष्ठ २३ 

काठमाडौं । संयुक्त अरब इमिरेट्स (यूएई) बाट नेपालीको उद्धार गरी शुक्रबार ल्याउने तयारी गरिएकोमा पैसाको विवाद भएपछि पहिलो उडान नै रोकिएको छ ।

१६८ जना सिट क्षमताको विमानमा नेपालीलाई पठाउने तयारी थियो । तर पैसाको विवाद भएपछि आफ्नै खर्चमा आउन चाहेका नेपालीहरुलाई मात्र लिएर एयर अरेबियाको विमान नेपालका लागि उड्ने भएको छ ।

यद्यपी उक्त विमानमा कति जना आउँदैछन् भन्नेबारे खुलेको छैन । तर अलपत्र परेका नेपाली जो आफ्नै खर्चमा आउन तयार छन्, उनीहरुलाई स्वदेश फर्काउन एयर अरेबियाको विमान शुक्रबार नेपाल आउने निश्चित भएको छ ।

युएइले आफ्नै खर्चमा १६८ जना नेपालीलाई स्वदेश फर्काउने भनेको थियो । यूएईले आफ्नै खर्चमा एयर अरेबियाका आठ उडानमार्फत अलपत्र नेपालीलाई पठाउने तालिकासहितको प्रस्ताव पठाएकोमा संस्कृति, पर्यटन तथा नागरिक उड्डयन मन्त्रालयले बिहीबार अनुमति दिएको थियो ।

पहिलो उडान शुक्रबार साँझ ६ बजे त्रिभुवन विमानस्थलमा अवतरण हुने भनिएको थियो । तर अन्तिम समयमा पैसाको विवाद उठेपछि उक्त उडान भने अझै अनिश्चित छ ।

यता म्यानमारका २६ नेपालीको भने उद्धार गरिसकिएको छ । उनीहरु शुक्रबार बिहान नेपाल अवतरण गरिसकेका छन् ।