पुष्कर खड्का
काठमाडौं - भक्तपुरमा मिनी ट्रक दुर्घटना हुँदा चालकको मृत्यु भएको छ।
भक्तपुरको चाँगुनारायण नगरपालिका–३ झौखेलस्थित कालीखोलामा ब्यासीबाट झौखेलतर्फ जाँदै गरेको बा ५ ख ३११ नम्बरको महाशक्ति ईंट्टाभट्टाको मिनी ट्रक दुर्घटना हुँदा मृत्यु भएको हो । मिनी ट्रक सडकबाट खोलामा खसेको थियो।
दुर्घटनामा चाँगुनारायण–३ झौखेल बस्ने अन्दाजी ३५ वर्षका ट्रक चालक नवराज लाछिवाको मृत्यु भएको प्रहरीले जनाएको छ।
घटनामा चालक लाछिवा ट्रकको अघिल्लो भागले च्यापिएको अवस्थामा फेला परेको परिसरका सूचना अधिकारी प्रहरी नायब उपरिक्षक (प्रनाउ) दिपक गिरीले जानकारी दिनु भयो ।
