उर्लाबारी । मोरङको उर्लाबारीमा स्थापित यु युथ्स अफ उर्लाबारीले रात्री सांगीतिक साँझ २०७६ को हिसाब सार्वजनिक गरेको छ ।
बुधबार पत्रकार सम्मेलन गरी गत शिवरात्रीमा आयोजना गरेको महाशिवरात्री सांगीतिक साँझको हिसाब सार्वजनिक गरेको हो । सो कार्यक्रममा तीन लाख ४७ हजार पाँच सय आम्दानी र दुई लाख ८१ हजार पाँच सय रुपैयाँ खर्च भएको संस्थाका सहसचिव समेत रहेका कार्यक्रम संयोजक किशोर श्रेष्ठले जानकारी दिनुभयो ।
कार्यक्रमबाट बचत रहेको ६० हजार रुपैयाँ मध्येबाट केही रकम कार्यालय सञ्चालन र केही रकम सामाजिक कार्यमा खर्च गरिने उहाँले बताउनुभयो ।
फागुन ९ गते आयोजित कार्यक्रममा उर्लाबारीको पहिचान राख्न सफल गायक डम्बर नेपाली, निशान भट्टराई र पूर्व मिस नेपाल निकिता चाण्डकलाई सम्मान समेत गरिएको थियो । उक्त संस्थाले प्रत्येक वर्ष महाशिवरात्रीमा साँगीतिक कार्यक्रम गर्दै आएको छ ।
२०७५ सालको शिवरात्रीमा आयोजित कार्यक्रमबाट संकलित तीन लाख १६ हजार दुई सय ३० रुपैयाँ मृगौला पीडित रेश्मा सेर्मालाई प्रदान गरिएको थियो ।
२०७५ साउनमा स्थापना भएको यु युथ्स अफ उर्लाबारीले प्रत्येक तीन÷तीन महिनामा सामाजिक कार्य गर्दै आएको अध्यक्ष प्रेमराज शर्माले बताउनुभयो ।
सांगीतिक साँझका साथै विद्यालय स्तरीय वक्तृत्वकला, वातावरण संरक्षण सम्बन्धी कार्यक्रम र तालिम लगायतका कार्यक्रम गर्दै आएको सचिव सुरेन्द्र शर्माले बताउनुभयो ।
उर्लाबारीका ९ वटै वडाका ४१ जना युवाहरु आवद्ध संस्था छोटो समयमा उर्लाबारीमा चर्चा कमाउन सफल भएको छ ।
यसैबीच, उर्लाबारीको विपत व्यवस्थापन कोषमा संस्थाले नगद २० हजार रुपैयाँ सहयोग गर्ने जनाएको छ । आज नगरपालिकालाई उक्त रकम हस्तान्तरण गरिने कोषाध्यक्ष रोशन घिमिरेले बताउनुभयो ।
पत्रकार सम्मेलनमा संस्थापक अध्यक्ष रमन शाक्यका साथै संस्थाका उपाध्यक्ष सुजन खड्का, सदस्य प्रियंका ठटाललगायतको उपस्थिति रहेको थियो ।
