पुष्कर खड्का
२ असार, काठमाडौं । सोलुखुम्बुको पासाङल्हामु गाउँपालिकाका अध्यक्ष डिङम दोर्जी शेर्पाको मृत्युु भएको छ ।
अध्यक्ष शेर्पाको ३९ वर्षको उमेरमा मंगलबार बिहान ८ :३० बजे मृत्युु भएको गाउँपालिका प्रवक्ता लाक्पाछिरी शेर्पाले जानकारी दिनु भयो ।
प्रवक्ता लाक्पाछिरी शेर्पाले दिएको जानकारी अनुसार सानो आन्द्रामा क्यान्सर भएर विगत १० महिनादेखि थलिनुभएका शेर्पाको स्वास्थ्यमा सुधार नआएपछि जेठ १० गते हेलिकोप्टर मार्फत जन्मस्थल लुक्ला ल्याइएको थियो ।आन्द्राको क्यान्सरबाट पीडित उनको काठमाडौंस्थित ह्याम्स र निदान अस्पतालमा उपचार गरिएको थियो ।
आफूले गाउँपालिका अध्यक्षको जिम्मेवारी सक्रियतापूर्वक निर्वाह गर्ने अवस्था नभएपछि शेर्पाले उपाध्यक्ष टासील्हामु शेर्पालाई जेठ १२ गतेदेखि कार्यवाहक अध्यक्षको जिम्मेवारी दिएका थिए ।
त्यति नै बेला उनले सामाजिक सञ्जाल मार्फत वडाध्यक्षहरु, कार्यपालिका सदस्य तथा कर्मचारीहरु समेतलाई उच्च मनोबलका साथ काम गर्न आग्रह गरेका थिए । तत्कालीन एमालेबाट निर्वाचित शेर्पा नेकपा सोलुखुम्बुको जिल्ला कमिटी सदस्य पनि थिए ।
