असार ६, २०७७ शनिबार| रासस
काठमाण्डौ – लगानी बोर्डले एक खर्ब ८५ अर्ब ४३ करोड रुपैयाँ बराबरका सात वटा परियोजनाको लगानी स्वीकृत गरेको छ । प्रधानमन्त्री केपी शर्मा ओलीको अध्यक्षतामा शुक्रबार सम्पन्न बोर्डको ४४ औँ बैठकले पाँच वटा जलविद्युत् परियोजना र दुई वटा सिमेन्ट उद्योगका लागि यो रकम बराबरका सात परियोजना स्वीकृत गरेको हो ।
बैठकले तीन सय २७ मेगावाट क्षमताको माथिल्लो मर्स्याङ्दी जलविद्युत् परियोजना–२ का लागि ७८ अर्ब ६५ करोड, ४२ दशमलव ९ मेगावाटको आँखुखोला जलविद्युत् परियोजनाको लागि ६ अर्ब ३० करोड, ९७ दशमलव २ मेगावाटको इसुवाखोला जलविद्युतको लागि १३ अर्ब ५७ करोड, ५७ दशमलव ३ मेगावाटको म्याग्दी खोला जलविद्युतको लागि १० अर्ब ३१ करोड र १६४ मेगावाट क्षमताको कालीगण्डकी गर्ज जलविद्युत् आयोजनाको लागि २८ अर्ब ६ करोड रुपैयाँ बराबरको लगानी स्वीकृत गरेको हो ।
त्यसैगरी बैठकले दाङ सिमेन्ट इन्डस्ट्रिजको लागि ३२ अर्ब ५० करोड रुपैयाँ र सम्राट सिमेन्ट उद्योगको लागि १५ अर्ब ५ करोड रुपैयाँ बराबरको लगानी स्वीकृत गरेको बोर्डले जनाएको छ । बाँकेको कोहलपुर र कपिलवस्तुको वाणगङ्गामा सञ्चालन हुने २० मेगावाट स्टोरेज क्षमतासहितको एक सय २५ मेगावाटका दुई छुट्टाछुट्टै सौर्य ऊर्जा परियोजनाको सार्वजनिक–निजी साझेदारीमा विकास तथा सञ्चालनको लागि अध्ययन गर्न राइजेन इनर्जी सिङ्गापुर जेभी पिटिई लिमिटेडलाई सर्वेक्षणको अनुमति पनि बैठकले दिएको छ ।
कोभिड–१९ को कारण नेपाल–चीन मैत्री औद्योगिक स्थल, दमक, मुक्तिनाथ केबलकार, मल्टिमोडल लजिस्टिक्स पार्क र प्राइभेट फ्रेट टर्मिनल एण्ड बल्क ह्यान्डलिङ फ्यासिलिटिज् परियोजनाको विस्तृत अध्ययन प्रतिवेदन पेस गर्ने समयावधि बैठकले थप गरेको छ ।
