काठमाडौं । पछिल्लो २४ घण्टामा नेपालमा थप २४६ जनामा कोरोना भाइरस (कोभिड १९) संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । संक्रमितमध्ये उपत्यकाका मात्रै ३१ जना रहेका छन् । काठमाडाैंका २२, भक्तपुरका १ र ललितपुरका ८ जनामा संक्रमण पुष्टि भएकाे हाे ।
अन्य संक्रमितहरू सुनसरी, मोरङ्ग, धनुषा, चितवन, महोत्तरी, सर्लाही, पर्सा, बझाङ, डोटी, बर्दिया, गोरखा, रौतहट, सिन्धुली, कास्की, लमजुङ, तनहुँ, बागलुङ, बर्दिया, रुपन्देही लगायत जिल्लाका छन् ।
मन्त्रालयका प्रवक्ता डा. जागेश्वर गौतमले आज (आइतबार) को प्रेस ब्रिफिङमा यसबारे पुष्टि गरेका हुन् । पछिल्लो २४ घण्टामा १११ जना संक्रमित डिस्चार्ज भएको पनि उनले जानकारी दिए ।
योसँगै नेपालमा कोरोना संक्रमितको संख्या २० हजार ३३२ पुगेको छ भने १४ हजार ६०३ जना डिस्चार्ज भएका छन् । देशभर ५ हजार ६७२ सक्रिय संक्रमित छन् । १० हजार ९३४ जना क्वारेन्टिनमा छन् । पछिल्लो २४ घण्टामा ८ हजार ८६१ जनाको पीसीआर परीक्षण भएको छ ।
