विराटनगरमा रक्सीको नसामा रहेका भाइले शुक्रबार राति धारिलो हतियार प्रहार गरेर दाजुको हत्या गरेका छन् ।
मोरङ प्रहरी प्रमुख एसपी जनार्दन जिसीका अनुसार विराटनगर महानगरपालिका–५ पृथ्वी चोकका ३१ वर्षीय काले भनिने साजन सिंहले पारिवारिक विवादमा दाजु ४२ वर्षीय भोला सिंहको हत्या गरेका हुन् । भोला राष्ट्रिय अनुसन्धान कार्यालय खोटाङमा कार्यरत हवल्दार हुन् ।
लागुऔषधको दुव्र्यसनमा फसिसकेका साजनले मादक पदार्थ सेवन ९मापसे० गरेर दाजुको हत्या गरेको प्रारम्भिक अनुसन्धानबाट खुलेको एसपी जिसीको भनाइ छ । उनका अनुसार पारिवारिक विवादलाई लिएर राति १०ः३० बजेतिर साजनले दाजुमाथि धारिलो हतियार प्रहार गरेको पाइएको छ ।
गम्भीर घाइते अवस्थाका भोलालाई तत्काल प्रहरीले उद्धार गरेर उपचारका लागि विराटनगरको विराट नर्सिङ होम एवं विराटनगर अस्पताल पु¥याएको थियो । तर अस्पताल पुर्याउनसाथ राति ११ बजेतिर चिकित्सकले मृत घोषित गरिदिएको प्रहरीले जनाएको छ । हतियार प्रहारबाट भोलाको घाँटीको दायाँ भाग, टाउको र देब्रे हातको पातोमा गहिरो चोट लागेको जिसीले बताए ।
एसपी जिसीका अनुसार मृतकलाई लागेको चोटका आधारमा घटनामा धारिलो हतियार प्रयोग भएको पुष्टि भए पनि साजनले भने सोकेसको सिसाले हानेको प्रहरीलाई बताएका छन् । ‘हत्यामा प्रयोग गरिएको हतियार फेला परेको छैन । खोजी रहेका छौँ,’ उनले भने, ‘घटनास्थलमा सिसाका फुटेका टुक्राहरु छरिएका छन् । कुर्सीहरु फुटेका एवं भाँचिएका छन् । घटनास्थल वरपर धेरै रगत लतपतिएको छ ।’
दाजुको हत्यामा संलग्न साजनलाई प्रहरीले पक्राउ गरिसकेको छ । पक्राउ गरेका बेला उनी रक्सीको नसामा लट्ठ थिए । दाजुसँगको झगडामा सामान्य घाइते भएका उनलाई पनि उपचारका लागि नर्सिङ होममै भर्ना गरिएको थियो । उनी आफै घाइते अवस्थामा रहेकाले घटनाका बारेमा धेरै कुरा खुल्न बाँकी रहेको प्रहरीले जनाएको छ ।
प्रहरीका अनुसार लागुऔषधको दुव्र्यसनमा फसेका उनले विगतमा पनि लागुऔषध र मादक पदार्थको नसामा विभिन्न अपराधिक घटना गराएको पाइएको छ । विगतमा विभिन्न अपराधिक घटनामा संलग्न साजनलाई प्रहरीले पटक–पटक पक्राउ गरेर कारबाही गरेको थियो ।
राष्ट्रिय अनुसन्धान कार्यालय खोटाङका सूचक रहेका भोला भने एक महिनाअघि तालिमका लागि हेटौँडा गरेको कार्यालयका प्रमुख हीरा भट्टराईले बताए । उनका अनुसार तालिम सकिएपछि उनी केही दिनअघि मात्रै विदा लिएर विराटनगरस्थित घर आएका थिए ।
निषेधाज्ञाका कारण सवारीसाधन सञ्चालन नहुँदा उनले विराटनगरबाट खोटाङ फर्कन नपाएको भट्टराईको भनाइ छ । भोलाले खोटाङ जानका लागि शुक्रबार बिहान एम्बुलेन्सको व्यवस्था गरिसकेका थिए । तर अन्तिम समयमा एम्बुलेन्सले नभ्याएपछि उनी घरमै रोकिएर रहेको पाइएको प्रहरीको भनाइ छ ।
भोलाका १६ वर्ष मुनिका दुई छोरा र श्रीमती छन् । भोलाको हत्या गर्ने साजनको भने गत वैशाखमा श्रीमतीसँग सम्बन्ध विच्छेद भइसकेको पाइएको छ । मादक पदार्थ र लागुऔषध सेवन गरेर सधैँ घरमा झैझगडा तथा कुटपिट गर्ने गरेपछि श्रीमतीले सँगै बस्न नमानेर सम्बन्ध विच्छेद गरेको स्थानीयको भनाइ छ ।
तर कानुनी रूपमा साजनसँग अलग भए पनि श्रीमती उनकै परिवारको संरक्षणमा थिइन् । प्रहरीका अनुसार श्रीमतीलाई परिवारका अन्य सदस्यले समर्थन गरेको भन्दै बारम्बार साजनले घरमा झगडा गरिरहेको पाइएको छ । त्यही विषयलाई लिएर विवाद गरिरहेको पाइएपछि साजनलाई सम्झाईबुझाई गर्न पुगेका दाजुकै हत्या गरेको प्रहरीको प्रारम्भिक अनुसन्धानबाट खुलेको छ ।
एसपी जिसीले घटनाको गम्भीर रूपले अनुसन्धान थालिएको जनाए । दाजुको हत्यामा संलग्न साजनविरुद्ध कर्तव्य ज्यान मुद्दा चलाउने प्रहरीको तयारी छ ।
