वैशाख २५, सिन्धुपाल्चोक । युवा भनेका देशका, विकासका मेरुदण्ड हुन । ईच्छाशक्ति भएमा असम्भव पनि सम्भव हुन्छ । अब ठूलोसिरुवारी र वरपरका स्थानिय वासीहरुले विरामी परेर अकालमा मृत्यु भोग्नु पर्ने छैन किनकी स्थानीय युवाहरुले सामाजिक सञ्जाल फेसबुकको माध्यमबाट चन्दा संकलन गरेर गाउँमा एम्बुलेन्स किनेका छन् ।
ठूलोसिरुवारी गा.वि.स. वडा नं. ६ हाल चौतारा साँगाचोकगढी नगरपालिका १३ ठुलोसिरुवारीका युवाहरुले सामाजिक संजाल फेसबुकलगायतबाट रकम संकलन गरेर एम्बुलेन्स खरिद गरेका हुन् ।
स्वदेश तथा विदेशमा रहेका युवाहरुका लागि ठुलोसिरुवारी विकास समाजको अगुवाइमा एम्बुलेन्स खरिदका लागि अभियान सञ्चालन गरिएको थियो । देश विदेशमा रहने गाउँका साथै वरपरका र मन भएकाहरु सबैलाई सञ्जाल मार्फत अनुरोध गरेर एम्बुलेन्स खरिद गरिएको हो ।
एम्बुलेन्स खरिदका लागि ठुलोसिरुवारीका प्रत्येक घरबाट पनि रकम संकलन गरिएको एम्बुलेन्स सञ्चालक समितिका अध्यक्ष नारयणप्रसाद गौतमले जानकारी दिए ।
ठूलोसिरुवारीका प्रत्येक घरबाट एम्बुलेन्स खरिदका लागि सकेको सहयोग सबैले गरे,त्यसैले एम्बुलेन्स खरिदका लागि सहज भयो स्थानीय तारादेवी राणा मगरले भनिन् ।
स्थानीयले सुरु गरेको धुरीकरबापत ६ लाख संकलन भएको थियो । सामाजिक सञ्जाल र धुरीकरबाट संकलन भएको रकममा नपुग रकम चौतारा नगरपालिका र वडा कायार्नलयले सहयोग गरेको चौतारा साँगाचोकगढी नगरपालिका १३ का वडाअध्यक्ष रामप्रासद गौतमले जानकारी दिए ।
एम्बुलेन्स सञ्चालनका लागि आगामी दिनमा वडा कार्यालयले सहयोग गर्ने वडाअध्यक्ष गौतमले बताए । स्थानीयको सहयोगमा खरिद गरिएको एम्बुलेन्स सेवाको वडा अध्यक्ष रामप्रसाद गौतमले एक समारोहका बीच शुभारम्भ गरेका हुन। एम्बुलेन्स खरिद पछि यस भेगका ५ हजार बढीलाई फाइदा पुग्ने एम्बुलेन्स सञ्चालक समितिका अध्यक्ष गौतमले बताए ।
एम्बुलेन्समा अक्सिजन सिलिन्डर समेत जडान गरिएको छ । एम्बुलेन्सलाई प्रभावकारी र सर्वसुलभ बनाइने एम्बुलेन्स सञ्चालक समितिले जानकारी दिएको छ ।
