काठमाडौं – नेपाली कांग्रेसका नेता रामहरि खतिवडा प्रतिनिधि सभा निर्वाचनमा पराजित भए । पराजित हुँदा पनि आफूलाई हराउने तत्कालीन एमालेबाट विजयी यज्ञराज सुनुवारलाई फूलको माला लगाएर शुभकामना र बाधाई दिए ।
खतिवडाले त्यस बेला भनेका थिए, ‘माननीय यज्ञराज सुनुवारजी जनताले तपाईलाई जिताएका छन्, विश्वास गरेका छन्, दुःख र सुःखमा तपाईले साथ दिनु होला । जनताका कुरा सुन्नु होला ।’
खतिवडाले चेतावनीयुक्त शैलीमा त्यस बेला भनेको अभिव्यक्तिलाई नेकपाका सांसद सुनुवारले सुनकोशी नदीमा बगाइदिए । सुनुवारले अहिले बेलायती सेनाका समस्या बोकेर हिँडेका छन् । एनजिओ र आइएनजिओका कार्यक्रममा सहभागी हुन सुनुवारलाई भ्याइ नभ्याइ छ ।
तर, पराजित भएर पनि नेपाली कांग्रेसका युवा नेता खतिवडाले हरेक पल, हरक्षण ओखलढुंगेली जनताको माझमा आफूलाई उभ्याइरहेका छन् । जिल्लाबासी कसैको पनि फोन आउँदा होस् या भेटेर आफ्ना समस्याभन्दा होस् खतिवडाले आफ्नो तर्फबाट सक्ने पहल शुरु गरिहाल्छन् ।
दुईतिहाइको कम्युनिस्ट सरकारले ल्याएको नयाँ बजेटमा पनि खतिवडाले आफ्नै व्यक्तिगत पहल र भनसुनका आधारमा थुप्रै विसकाका कार्यक्रमहरू पारेका छन् ।
खतिवडालाई ओखलढुंगामा बिजुली, पिउनेपानी, सडक, शिक्षा, स्वास्थ्य, रोजगारीको चिन्ताले सताइरहन्छ । भन्छन्, ‘नेपाली कांग्रेसको दुईतिहाइको सरकार भएका भए मैले ओखलढुंगामा विकासका सयौँ कार्यक्रम ल्याउने थिएँ । तैपनि केही छैन सक्दो कार्यक्रमहरू ल्याउने प्रयास गरेको छु ।’
एक हप्ता यता देशभरि परेको अविरल वर्षाका कारण ओखलढुंगा पनि प्रभावित बन्न पुग्यो । जिल्लाभित्रका सडक र अन्य जिल्लासँग जोडिने सडकहरू भत्किएर अबरुद्ध बने । नेपाली कांग्रेसका युवा नेता एवम् पूर्वसांसद खतिवडा सडक खुलाउन आग्रह गर्दै निवेदन लिएर भौतिक मन्त्रालय पुगिहाले । सचिवलाई भनेर बाटो खोल्न काम शुरु गराए ।
खतिवडाले सचिवलाई भनेर बाटो खुलाउन पहल गरेपछि लाजकाज नेकपाका सांसद सुनुवारले दुई दिनपछि मन्त्री रघुवीर महासेठलाई भेटेर औपचारिकता निभाएका थिए ।
त्यति मात्रै होइन खतिवडाले बाढी र पहिलोमा परेर ज्यान गुमाएका पाँच जनाको परिवारलाई आफ्नो तर्फबाट जनही दश–दश हजारका दरले नगद सहायता उपलब्ध गराएका छन् । ओखलढुंगा जिल्लाका प्रमुख जिल्ला अधिकारी गणेश आचार्यमार्फत खतिवडाले मृत्यु भएका आफन्तको परिवारलाई नगद राहत वितरण गरेका हुन् ।
चिसंखु गाउँपालिका वडा नम्बर ४ की ८५ वर्षीया पासाङ पुटी शेर्पालाई स्थानीय लसुने खोलाले बगाएर मृत्यु भएको थियो । सिद्धिचरण नगरपालिका वडा नम्बर ६मा घर भत्किँदा ४० वर्षीया कान्छीमाया श्रेष्ठ मृत्यु भएको थियोे ।
मोलुङ गाउँपालिका वडा नम्बर ७ मा घर भत्किँदा ४० वर्षीया खपुटी शेर्पा र उनकी १२ वर्षीया छोरी याङजी शेर्पाको मृत्यु भएको थियो ।
सुनकोशी गाउँपालिकाको वडा नम्बर ४ का ५५ वर्षीय कुमार राईलाई मोलुङ खोलाले बगाउँदा मृत्यु भएको थियो ।
खतिवडाले ओखलढुंगाको सुनकोशी गाउँपालिका १ निवासी मिलन लुइँटेल, महेश लुइँटेल, मोलुङ गाउँपालिका रामपुरका विशाल तोलाङगीलगायतलाई जागिर समेत खुवाइदिएका छन् ।
यति मात्रै होइन खतिवडाले आफ्ना जिल्लाबासीहरू बिरामी पर्दा हेलिकप्टर पठाएर उद्धार समेत गर्ने गरेका छन् । मंगलबार मात्रै उनले दुई जना बिरामीलाई हेलिकप्टरबाट उद्धार गरेर काठमाडौं ल्याइ शिक्षण अस्पताल महाराजगञ्जमा भर्ना गरिदिएका छन् ।
केही महिना अगाडि जिल्लामा आगलागी हुँदा राहत बोकेर आफै पुगेका खतिवडाले एकजना अपाङलाई ह्वील चेयर समेत लगेर सहयोग गरेका छन् । खतिवडाले राजनीतिक पूर्वाग्रही भएर कुनैपनि काम गर्दैनन् ।
ओखलढुंगाको भनेपछि सबैलाई सहयोग गर्ने उनको बानी रहेको खतिवडाका सहयोगी हुकम राईले बताए । ‘रामहरि दाईले कुनै पनि राजनीतिक पूर्वाग्रह राख्नु हुँदैन’, उनले भने, ‘सबैलाई बराबरीमा राखेर सहयोग गर्नु हुन्छ
