सर्लाही , साउन २४ गते धादिङ बस दुर्घटनापछि सर्लाहीको विभिन्न बस्ती शोकमा डुबेको छ ।
सदरमुकाम मलङ्गवाबाट काठमाण्डौं गइरहेको ना ६ ख ७४६९ नम्वरको सृष्टि डिलक्स रात्री बस सुक्रवार बिहान धादिङको बेनिघाट रोराङ गाउँपालिका–३, सलाङघाटबाट त्रिसुली नदीमा खसेको थियो । दुर्घटनामा परेका सबै सर्लाहीवासी हुन् । त्यसमध्ये पनि ब्रह्मपुरी गाउँपालिका–४, त्रिभुवननगरका एकै घरका चार जना दुर्घटनामा परेका छन् । त्यसमध्ये एक जना घाईते छन् भने तीन जना बेपत्ता छन् ।
त्रिभुवननगरका चन्देश्वर प्रसाद रौनियारका दाई, भाउजु, छोरा र छोरी दुर्घटनामा पर्नुभएको हो । दुर्घटनाको खबर सुनेपछि चन्देश्वरकी श्रीमती सुक्रवार बिहानैबाट बेहोस हुनुहुन्छ । रौनियारका दाई राजनारायण, भाउजु शोभा र छोरा शौरभ नदीमा बेपत्ता हुनुहुन्छ भने छोरी श्वेताको काठमाण्डौंमा उपचार भइरहेको छ । राजनारायण ४० वर्षदेखि काठमाण्डौंमा व्यापार गरेर बस्दै आउनु भएको थियो । उहाँले भतिज शौरभ र भतिजी श्वेतालाई सँगै राखेर पढाइरहनु भएको थियो ।
शौरभ मेडिकल तयारी गरिरहनु भएको थियो भने श्वेताले भर्खरै कक्षा १२ पास गर्नुभएको थियो । उहाँहरु मङ्गलवारमात्रै साउनी घडी पर्व मनाउन घर आउनु भएको थियो । बुधवारको पर्व मनाइ सकेर उहाँहरु बिहीवार साँझ रात्री बस चढ्नु भएको थियो । बस दुर्घटनाको घटनापछि रौनियार परिवार र छरछिमेकी बिछिप्त भएका छन् । छिन–छिनमै मुर्छा पर्ने चन्देश्वर र उहाँकी श्रीमती उषादेवीलाई छरछिमेकीले सम्झाउने प्रयास गरिरहेका छन् ।
रौनियार परिवार मात्रै होइन् बसमा सवार ४२ यात्रुसहित बसका तीन जना कर्मचारीका परिवारमा पनि रुवाबासी चलेको छ । बस दुर्घटनामा पर्ने यात्रुहरु जिल्ला सदरमुकाम मलङ्गवासहित ब्रह्मपुरी, चक्रघट्टा, हरिपुर, कविलासी र भारतीय नागरिक समेत रहेका छन् ।
सर्लाहीका प्रहरी उपरीक्षक (एसपी) गोपालचन्द्र भट्टराईले मलङ्गवास्थित सृष्टि बसको काउण्टरमा रेकर्ड भएका यात्रुहरुको विवरण धादिङ प्रहरीलाई उपलब्ध गराइएको बताउनुभयो । उहाँले केही मृतक, घाईते र बेपत्ताका परिवार सम्पर्कमा आएकाले उनीहरुलाई धादिङ प्रहरीसँग सम्पर्क गर्न आग्रह गरिएको बताउनुभयो ।
Print
