काठमाडौं, १८ असार । विश्वकप २०१८ अन्तर्गत नकआउट चरणको छैठौं खेलमा बलियो टोली बेल्जियमसँग एसियाली मुलुक जापान खेल्दैछ । रसियाको रोस्तोेभ–न–दन शहरमा आयोजना हुने यो खेल नेपाली समय अनुसार राती ११ः४५ मा सुरु हुनेछ ।
समुह चरणको ३ खेलमा शतप्रतिशत नतिजा निकालेको बेल्जियम यो विश्वकपमा उत्कृष्ट देखिएको छ । यस्तोमा विश्वकप इतिहासमा तेश्रो पल्ट क्वार्टरफाइनल पुग्ने उद्देश्य सहित मैदानमा उत्रने बेल्जियमले जापानको चुनौती पन्छाउनुपर्ने अवस्था आएको छ ।
पछिल्लो २२ खेलमा अपराजित रहेको बेल्जियमले आजको खेलमा जितेमा क्वार्टरफाइनलमा स्थान पक्का गर्नेछ । इंग्ल्याण्ड विरुद्ध ६ जना प्रमुख खेलाडिलाई आराम दिइ खेलेकोमा पनि जित हात पारेको बेल्जियमले जापान विरुद्ध पनि आक्रामक खेल्ने पक्का छ । यस्तोमा जापानले पनि यस प्रतियोगितामा हाल सम्म खेलिरहेको आक्रामक रणनिती अपनाउँछ कि रक्षात्मक भएर खेल्छ , त्यो हेर्न धेरै समय कुर्नु पर्नेछैन ।
अर्कोतर्फ जापानले समुह चरणको पहिलो खेलमा कोलम्बीया जस्तो बलियो टोलीलाई हराइ ३ खेलमा ४ अंक जोडेपछि फेयर प्लेको आधारमा नकआउट चरणमा स्थान बनाएको हो । अनुभव पर्याप्त भएको यो टोली विश्वकप इतिहासमा पहिलो पटक क्वार्टरफाइनल पुग्न लालायित छ ।
आजको खेलमा विजयी टोलीको क्वार्टरफाइनल निश्चीत भएको र पराजित टोली विश्वकपबाट बाहिरिने भएकोले यो खेल प्रतिस्पर्धात्मक हुनेछ । आज विजयी हुने टोलीले क्वार्टरफाइनलमा ब्राजील र मेक्सिको बिचको विजेताको सामना गर्नुपर्नेछ ।