काठमाडौं, ८ भदौ । मुलुकको ध्यान यतिबेला रवि लामिछानेलाई चितवन प्रहरीले एक्कासी थुनामा राखेपछि चर्चाको शिखरमा छन् ।
चर्चित टेलिभिजन प्रस्तोता लामिछाने न्यूज २४ टेलिभिजनमा ‘सिधा कुरा जनतासँग’ कार्यक्रम चलाउँदै आइरहेका थिए । लामिछानेलाई न्यूज २४ टेलिभिजनको कार्यालयबाट पक्राउ गरी चितवन पुर्याइएको छ ।
लामिछानेभन्दा अगाडि चलचित्र निर्माता छवि ओझा र नायिका शिल्पा पोखरेलको चर्चाले बजारमा स्थान पाएको थियो ।
चलचित्र निर्माता ओझाले तेस्री श्रीमतीका रुपमा शिल्पालाई सम्पत्तिमा अधिकार दिने सुइँको पाएपछि जेठी श्रीमतीले मुद्दा हालेकी थिइन् ।
माइली श्रीमती रेखा थापासँग ओझाको सम्बन्धविच्छेद भइसकेको र आधिकारिक रुपमा कान्छी हुन् लागेकी शिल्पासँग पनि सम्बन्ध बिग्रिएको जानकारहरुले बताएका छन् ।
यता गत श्रावण २० गते चितवनको नारायणगढस्थित होटल कंगारुमा शालिकराम पुडासैनीको शंकास्पद रुपमा झुण्डिएको अवस्थामा शव फेला परेको थियो ।
मानसिक दबाब र यातना दिइएको कारण आत्महत्या गरेको आरोप लामिछाने, युवराज कँडेल र नर्स अस्मिता कार्कीमाथि पुडासैनीले भिडियो रेकर्डमा लगाएका छन् ।
यस घटनाबारे प्रहरीले अनुसन्धान गरिरहेको छ । तथापि सामाजिक सञ्जाल प्रयोगकर्ताहरुले र लामिछानेका समर्थकहरुले चितवनमा गरेको लगातारको प्रदर्शनले जिल्ला प्रशासन कार्यालय चितवनले चौविसकोठीदेखि मालपोत चोकसम्म निषेधाज्ञा जारी गरेको छ ।
रवि लामिछानेका पक्ष र विपक्षहरुका कारण मुलुक चर्चित बन्न पुगेको छ । लामिछानेले न्यूज २४ मा सिधा कुरा जनतासँग कार्यक्रम चलाएर पीडितहरुको समस्यालाई समाधान गरेका कारण चर्चित बन्न पुगेका हुन् ।
हिमाल, पहाड, तराई र विदेशबाट लामिछानेको समर्थनमा लहर उर्लेको छ । कतिपयले रवि लामिछानेलाई फसाउन खोजेको समेत बताएका छन् ।
यसैबीच, लामिछानेलाई अनुसन्धानका लागि पाँच दिन म्याद थप गरिएको छ । यसअघि पनि उनलाई पाँच दिन थुनामै राखेर अनुसन्धान गर्न अदालतले अनुमति दिएको थियो । नयाँ बिर्मशका साथमा ।
